متعه نکاح هغه نکاح ده چې د يوې ټاکلې مودې لکه : څو ورځو ، څو مياشتو لپاره تړل شوې وي څنګه چې د نکاح په شرايطو کې مو وستل چې ايجاب او قبول به د مؤقت وخت لپاره نه وي نو دغه نکاح د مذاهبو د جمهورو فقهاوو په نزد باطله ده .
ځکه چې په شريعت له دغې نکاح څخه منع شوې او هغه حرامه ګرځول شوې ده :
عن علي رضي الله عنه : « أن رسول الله صلى الله وسلم نهى عن نكاح المتعة وعن لحوم الحمر الأهلية زمن خيبر»[1] .
ژباړه :له حضرت علی رضی الله عنه څخه روايت چې رسول الله صلی الله عليه وسلم د خيبر د فتحې په ورځ د متعه نکاح او د اهلي خره د غوښو څخه منع و فرمايل ( دا دواړه يې حرام اعلان کړل ) .
متعه نکاح د جاهليت په زمانه کې موجوده وه او د اسلام په شروع کې مباح وه او وروسته جناب رسول الله صلی الله عليه دغه نکاح د قيامت تر ورځې پورې حرامه اعلان کړه ځکه چې شرعې احکام اکثراً په تدريجې توګه نازل شوي دي :
رسول الله صلی الله عليه وسلم فرمايي: «يَا أَيُّهَا النَّاسُ إِنِّي قَدْ كُنْتُ أَذِنْتُ لَكُمْ فِي الاِسْتِمْتَاعِ مِنَ النِّسَاءِ وَإِنَّ اللَّهَ قَدْ حَرَّمَ ذَلِكَ إِلَى يَوْمِ الْقِيَامَةِ»[2] .
ژباړه: ای خلکو تاسې ته مې د مؤقتې نکاح په اړه اجازه کړې وو ، مګر يقيناً چې الله پاک دغه نکاح د اوس څخه وروسته د قيامت تر ورځې پورې حرام وګرځوله .
آن لاين اسلامي لارښود
[1] – رواه البخاري : ۳۹۷۹ و مسلم : ۱۴۰۷.
[2] – رواه مسلم :۱۴۰۶ .