دریم درس: د الله تعالی او د رسول الله صلی الله عليه وسلم پیروي فرض ده

د الله تعالی او د هغه د رسول الله صلی الله عليه وسلم  صلی الله عليه وسلم اطاعت او پیروي کول په اسلام کښی یو مهم اصل او بنسټ دې، او یو بنده تر هغه مسلمان کیدې نشي تر څو چه هغه د الله تعالی او د هغه د رسول الله صلی الله عليه وسلم اوامرو ته غاړه ایښودونکې نشي، او دا عقیده ولري چه د الله تعالی او دهغه د رسول الله صلی الله عليه وسلم اطاعت او پیروي کول فرض دي، نو هغه خلک چه د الله تعالی او د هغه د رسول صلی الله عليه وسلم اطاعت او پیروي کوي داسی کامیابي ورپه برخه کیږي چه د الله تعالی رضامندي، رحمت او لوﺉ فضل په لاس ورځي، او له دردناک عذاب څخه خلاصې مومي، او هغه څوک چه د الله تعالی او د هغه د رسول صلی الله عليه وسلم له امر او احکامو څخه سر غړونه کوي او ورڅخه مخ اړوي نو داسی خلک په ښکاره تاوان باندي تاواني کیږي، او ځان د الله تعالی قهر او ع‍ذاب ته وړاندی کوي.

او هغه څوک چه دا عقیده لري او ګومان کوي چه پر ده د الله تعالی او د هغه د رسول صلی الله عليه وسلم اطاعت او پیروي فرض نه ده، نو داسی بنده مسلمان کیدې نشي؛ ځکه الله تعالی فرمایي: ﴿وَمَا كَانَ لِمُؤۡمِنٖ وَلَا مُؤۡمِنَةٍ إِذَا قَضَى ٱللَّهُ وَرَسُولُهُۥٓ أَمۡرًا أَن يَكُونَ لَهُمُ ٱلۡخِيَرَةُ مِنۡ أَمۡرِهِمۡۗ وَمَن يَعۡصِ ٱللَّهَ وَرَسُولَهُۥ فَقَدۡ ضَلَّ ضَلَٰلٗا مُّبِينٗا ﴾ [الأحزاب: 36].

ترجمه: «هیڅکله روا نه دي هیڅ مؤمن سړي او نه مؤمنی ښځی ته دا کار – چه کله په یو کار کښی الله تعالی او د هغه رسول صلی الله عليه وسلم یوه فیصله وکړي -نو دغه مؤمن سړي او مؤمنی ښځی ته بیا په دغه کار ددوﺉ کښي د بل اختیار لټونه روا نه ده، او هغه څوک چه سرغړونه وکړي د الله تعالی او دهغه د رسول صلی الله عليه وسلم څخه، نو بیشکه دې بي لاری شو په بی لاریتوب ښکاره سره له حق نه».

همداراز الله تعالی د خپل کتاب په بل ځاي کښی فرمایي:

﴿يَٰٓأَيُّهَا ٱلَّذِينَ ءَامَنُوٓاْ أَطِيعُواْ ٱللَّهَ وَأَطِيعُواْ ٱلرَّسُولَ وَلَا تُبۡطِلُوٓاْ أَعۡمَٰلَكُمۡ ﴾ [محمد: 33].

ترجمه: «اي مؤمنانو تاسو پیروي وکړﺉ د الله تعالی او پیروي وکړﺉ د هغه د رسول الله صلی الله عليه وسلم ، او خپل عملونه- د الله تعالی او د هغه د رسول صلی الله عليه وسلم په نافرمانۍ او سرغړونه- مه باطلوﺉ».

او همداراز الله تعالی د خپل کتاب په بل ځاي کښی بیا فرمایي:

﴿وَأَطِيعُواْ ٱللَّهَ وَٱلرَّسُولَ لَعَلَّكُمۡ تُرۡحَمُونَ ﴾ [آل عمران: 132].

ترجمه: «او پيروي وکړﺉ – اي مومنانو – د الله تعالی او دهغه د رسول الله صلی الله عليه وسلم ؛  ددي لپاره چه پر تاسو باندي د الله تعالی رحم وکړې شي».

همداراز الله تعالی په بل ځاي کښی فرمایي:

﴿وَمَن يُطِعِ ٱللَّهَ وَرَسُولَهُۥ يُدۡخِلۡهُ جَنَّٰتٖ تَجۡرِي مِن تَحۡتِهَا ٱلۡأَنۡهَٰرُ خَٰلِدِينَ فِيهَاۚ وَذَٰلِكَ ٱلۡفَوۡزُ ٱلۡعَظِيمُ ، وَمَن يَعۡصِ ٱللَّهَ وَرَسُولَهُۥ وَيَتَعَدَّ حُدُودَهُۥ يُدۡخِلۡهُ نَارًا خَٰلِدٗا فِيهَا وَلَهُۥ عَذَابٞ مُّهِينٞ ﴾ [النساء: 13-14].

ترجمه: «او هغه څوک چه پیروي او اطاعت کړي د الله تعالی او د هغه د رسول صلی الله عليه وسلم نو الله تعالی به يي داسی جنتونو ته ننباسي چه د هغی د ماڼیو لاندي ویالی بهیږي، په داسی حال کښی چه همیشه به وي دوﺉ به دغه جنتونو کښی او همدا لویه کامبیابي ده، او – ددي په عکس – هغه څوک چه مخالفت او سرغړونه وکړي د الله تعالی او د هغه د رسولصلی الله عليه وسلم  ، او د الله تعالی له حدودو څخه تیر شي، نو الله تعالی به يي اور ته ننباسي، په داسی حال کښی چه همیشه به وي دوﺉ په دغه اور کښی، او ددي سره سره به ددوﺉ لپاره سپکونکې عذاب هم وي».

همدغه شان الله تعالی په بل ځاي کښی فرمایي:

﴿وَمَن يُطِعِ ٱللَّهَ وَٱلرَّسُولَ فَأُوْلَٰٓئِكَ مَعَ ٱلَّذِينَ أَنۡعَمَ ٱللَّهُ عَلَيۡهِم مِّنَ ٱلنَّبِيِّ‍ۧنَ وَٱلصِّدِّيقِينَ وَٱلشُّهَدَآءِ وَٱلصَّٰلِحِينَۚ وَحَسُنَ أُوْلَٰٓئِكَ رَفِيقٗا 69 ذَٰلِكَ ٱلۡفَضۡلُ مِنَ ٱللَّهِۚ وَكَفَىٰ بِٱللَّهِ عَلِيمٗا ﴾ [النساء: 69-70].

ترجمه: «او هغه څوک چه پیروي او اطاعت وکړي د الله تعالی او د هغه د رسول صلی الله عليه وسلم نو دوﺉ به د الله تعالی د هغه نیکانو بندګانو سره یوځاي وي چه الله تعالی ورباندي خپل نعمت کړې دې، چه هغوﺉ پیغمبران، صدیقین، شهیدان او نور نیکان بندګان دي، او همدوﺉ ډیر ښه دي په ملګرتوب کښی، او دا کار مهرباني ده د الله تعالی لخوا، او الله تعالی کافي دې په علم او پیژندلو د خلکو او د هغوﺉ د اعمالو او رفیقانو کښی».

همدارنګه الله تعالی په بل ځاي کښی فرمایي:

﴿وَمَن يُطِعِ ٱللَّهَ وَرَسُولَهُۥ فَقَدۡ فَازَ فَوۡزًا عَظِيمًا ﴾ [الأحزاب: 71].

ترجمه: «او هغه څوک چه پیروي وکړي د الله تعالی او د هغه د رسول صلی الله عليه وسلم نو بیشکه دې کامیاب شو په لوﺉ کامیابۍ سره».

همداډول الله تعالی په بل ځاي کښی فرمایي: ﴿وَمَن يَعۡصِ ٱللَّهَ وَرَسُولَهُۥ فَإِنَّ لَهُۥ نَارَ جَهَنَّمَ خَٰلِدِينَ فِيهَآ أَبَدًا ﴾ [الجن: 23].

ترجمه: «او هغه څوک چه مخالفت و سرغړونه وکړي د الله تعالی او د هغه د رسول صلی الله عليه وسلم نو یقیناً دده لپاره د جهنم اور دې په داسی حال کښی چه دوﺉ به په دغه اور کښی همیشه وي د تل لپاره».

او په بل ځاي کښی بیا فرمایي:

﴿مَّن يُطِعِ ٱلرَّسُولَ فَقَدۡ أَطَاعَ ٱللَّهَ﴾ [النساء: 80].

ترجمه: «او هغه څوک چه د رسول الله صلی الله عليه وسلم  اطاعت او پيروي کوي، نو هغه په دغه پیروۍ سره د الله تعالی پیروي کوي».

او د رسول الله صلی الله عليه وسلم  د پیروﺉ په اهمیت کښی الله تعالی په بل ځاي کښی فرمایي:

﴿وَمَآ ءَاتَىٰكُمُ ٱلرَّسُولُ فَخُذُوهُ وَمَا نَهَىٰكُمۡ عَنۡهُ فَٱنتَهُواْ﴾ [الحشر: 7].

ترجمه: «او هغه څه چه تاسو ته یي رسول الله صلی الله عليه وسلم  درکوي او تاسو ته پری امر کوي نو هغه واخلۍ او عمل پری وکړﺉ، او هغه څه چه رسول الله صلی الله عليه وسلم  تاسو ورڅخه منع کوي نو تاسو ورڅخه منع شۍ».

نو دا ټول آیاتونه په دی ښکاره دلالت کوي چه د الله تعالی او د هغه د رسول صلی الله عليه وسلم اطاعت او پیروي کول فرض دي، او هغه څوک چه د الله او د هغه د رسول صلی الله عليه وسلم اطاعت او پیروي کوي الله ورته د جنتونو او نعمتونو وعده ورکوي، او هغه څو ک چه د الله تعالی او د هغه د رسول صلی الله عليه وسلم څخه مخالفت او سرغړونه کوي نو الله تعالی یي په دردناک عذاب سره ویروي.

او اطاعت او پیروي داسی کیږي چه اوامر ومنل شي او عمل پری وشي، او هغه شیان چه ورڅخه منع راغلی وي بنده ورڅه ځان وساتي، او همدا د دین اصلي حقیقت دې، او هغه دا چه د الله تعالی په اوامرو عمل وشي، او هغه څه چه ورڅخه یي منع فرمایلی ده ورڅخه ځان وژغورل شي.

او الله جل جلاله دا دین مونږ ته آسان کړې دې، او مونږ يي په داسی څه مکلف کړي نه یو چه زمونږ له توان څخه بهر وي، بلکه په هغه څه مو مکلف کوي چه زمونږ په توان کښی وي، لکه چه الله جل جلاله په خپل کتاب کښی فرمايي:

﴿فَٱتَّقُواْ ٱللَّهَ مَا ٱسۡتَطَعۡتُمۡ﴾ [التغابن: 16].

ترجمه: «د الله تعالی څخه هومره ویریږﺉ چه ستاسو په طاقت او توان کښی وي».

همداشان الله تعالی فرمايي:

﴿لَا يُكَلِّفُ ٱللَّهُ نَفۡسًا إِلَّا وُسۡعَهَا﴾ [البقرة: 286].

ترجمه: «نه مکلف کوي الله تعالی هیڅوک مګر په اندازه د توان د هغی».

او په بل ځاي کښی فرمایي:

﴿وَمَا جَعَلَ عَلَيۡكُمۡ فِي ٱلدِّينِ مِنۡ حَرَجٖ﴾ [الحج: 78].

ترجمه: «او نه ده ګرزولې الله تعالی په تاسو باندی په دین کښی کومه سختي».

او د رسول الله صلی الله عليه وسلم  څخه ابوهریرهرضی الله عنه  روایت کوي چه بیشکه رسول الله صلی الله عليه وسلم  فرمایلي دي: «إِنَّ الدِّينَ يُسْرٌ وَلَنْ يُشَادَّ الدِّينَ أَحَدٌ إِلاَّ غَلَبَهُ». [رواه البخاري].

ترجمه: «بیشکه دا دین آسان دې، او هیچا له دین سره زور نه دې ویلې مګر دین ورباندی غالب شوې دې».

او د ابو هریرهرضی الله عنه  په بل روایت کښی له رسول الله صلی الله عليه وسلم  څخه راغلي دي چه رسول الله صلی الله عليه وسلم  فرمایلي دي: «إِذَا نَهَيْتُكُمْ عَنْ شَيْءٍ فَاجْتَنِبُوهُ، وَإِذَا أَمَرْتُكُمْ بِأَمْرٍ فَأْتُوا مِنْهُ مَا اسْتَطَعْتُمْ». [متفق عليه].

ترجمه: «هغه څه چه زه تاسو ورڅخه منع کوم نو تاسو ورڅخه ځان وساتۍ، او هغه څه چه تاسو ته پری امر کوم نو څومره چه مو توان وي عمل پری وکړﺉ».

او د الله تعالی او د هغه د رسول صلی الله عليه وسلم اوامر دری درجی لري:

لومړﺉ درجه: او هغه دا چه ددغه اوامرو څخه په اسلام باندي پاتي کیدل او استمرار لازمیږي، چه دالله تعالی په توحید باندی د امر کولو او په طاغوت باندي د کفر او له هغی څخه انکار کولو، او د اسلام له نواقضو او ماتونکو څخه ځان ساتلو کښی د الله تعالی د اوامرو او احکامو  اطاعت او پیروي وکړل شي.

نو هغه څوک چه ددي درجی اوامرو څخه مخالفت او سرغړونه کوي، او د الله تعالی سره شرک کوي، او یا هم د اسلام له نواقضو او ماتوونکو څخه د کوم ناقض او ماتوونكي مرتكب شي، لکه د الله تعالی او د هغه د رسول صلی الله عليه وسلم دروغجن ګڼل، او یا ددین په کومه مسأله پسی ټوقی مسخری کول، او یا داسی نورو نواقضو مرتکب شي نو داسی شخص کافر دې او د اسلام څخه وتلې دې.

دوهمه درجه: هغه اوامر چه په هغی باندی بنده له عذاب څخه بچ کیږي، لکه د واجباتو او فرائضو ادا کول، او له محرماتو څخه ځان ساتل، نو هغه څوک چه دا ډول اوامر عملي کوي نو دې د الله په حکم او امر باندی له عذاب څخه بچ کیږي، او  ددغه اطاعت او پیروۍ له کبله له ده سره د الله تعالی لخوا د لوﺉ ثواب وعده ده، او دا درجه د متقینو بندګانو درجه ده.

دریمه درجه: د واجباتو او مستحباتو ادا کولو، او له محرماتو او مکروهاتو څخه د ځان ساتلو اوامر:

 او همدا د بندګانو د کمال درجه ده، او ددي ډول اوامرو پوره کونکي د احسان دمرتبی خاوندان دي، له چا سره چه د اوچتو درجو وعده شوی ده، الله تعالی دی په خپل فضل او مهربانۍ ځمونږ  هم دغه درجه په برخه کړي.

او الله تعالی مونږ لپاره دین  پوره کړې دې، او په مونږ يي خپل نعمت پوره کړې دې، چه د اسلام دین یي راپوره کړې دې، لکه چه الله تعالی فرمایي:

﴿ٱلۡيَوۡمَ أَكۡمَلۡتُ لَكُمۡ دِينَكُمۡ وَأَتۡمَمۡتُ عَلَيۡكُمۡ نِعۡمَتِي وَرَضِيتُ لَكُمُ ٱلۡإِسۡلَٰمَ دِينٗا﴾ [المائدة: 3].

ترجمه: «نن ورځ ما تاسو ته ستاسو دین بشپړ کړ، او په تاسو می خپل نعمت تمام او پوره کړ، او ستاسو لپاره می د اسلام مقدّس دین ددین په توګه غوره کړ».

نو د اسلام دین کامل دین دې، او د شریعت احکام یي زمونږ د ژوند ټولو اړخونو ته شامل دي، ځکه خو په دغه شریعت کښی نقص او کمې نشته، او نه پکښی کوم اختلاف او تناقض شته، بلکه دا پوره آسانه او فطرتي دین دې چه د هر وخت او هر ځاي لپاره صالح او پکښی چلیږي، او د بندګانو ټولو احوالو ته شامل دې.

او هغه څوک چه د الله تعالی او  دهغه د رسول صلی الله عليه وسلم اطاعت او پیروي کوي، نو دې په حقیقت کښی دژوند په هر اړخ کښی سمی خوا ته لار موندونکې دې، لکه چه الله تعالی په خپل کتاب کښی فرمایي:

﴿إِنَّ هَٰذَا ٱلۡقُرۡءَانَ يَهۡدِي لِلَّتِي هِيَ أَقۡوَمُ﴾ [الإسراء: 9].

«بیشکه دا قرآنکریم هغی لاری ته ښودنه کوي چه ډیره سمه ده».

نو هیڅ بنده د الله تعالی په مخالفت او د هغه له کتاب څخه په سرغړونه کښی د خپل ځان لپاره کومه ښه پایله  لاس ته نشي راوړې.

همداشان رسول الله صلی الله عليه وسلم  فرمایلي دي:

«أَحْسَنَ الْهَدْيِ هَدْيُ مُحَمَّدٍصلی الله عليه وسلم  صلی الله عليه وسلم  » [روه النسائي].

ترجمه: «او بیشکه ډیره ښایسته او بهترین هدایت او لارښوونه د محمدصلی الله عليه وسلم   هدایت او لارښوونه ده».

نو د رسول الله صلی الله عليه وسلم  له لارښوونی څخه بله ښایسته او ښه لارښوونه نشته، او هیڅ امکان نشته چه یو بنده دي د رسول الله صلی الله عليه وسلم  په مخالفت او د هغه له لارښوونی څخه په سرغړونه کومی ښی درجی ته ورسیږي، او یا دی ورته کوم خیر په لاس ورشي، بلکه د بنده کمال، خلاصې، نیکبختي او د هدایت لوړی درجی ته رسیدل د هغه  د رسول الله صلی الله عليه وسلم  د اتباع او د هغه د پیروۍ په اندازه باندی ده، الله جل جلاله فرمایي: ﴿قُلۡ يَٰٓأَيُّهَا ٱلنَّاسُ إِنِّي رَسُولُ ٱللَّهِ إِلَيۡكُمۡ جَمِيعًا ٱلَّذِي لَهُۥ مُلۡكُ ٱلسَّمَٰوَٰتِ وَٱلۡأَرۡضِۖ لَآ إِلَٰهَ إِلَّا هُوَ يُحۡيِۦ وَيُمِيتُۖ فَ‍َٔامِنُواْ بِٱللَّهِ وَرَسُولِهِ ٱلنَّبِيِّ ٱلۡأُمِّيِّ ٱلَّذِي يُؤۡمِنُ بِٱللَّهِ وَكَلِمَٰتِهِۦ وَٱتَّبِعُوهُ لَعَلَّكُمۡ تَهۡتَدُونَ ﴾ [الأعراف: 158].

ترجمه: «اي خلکو! یقیناً زه تاسو ټولو ته د الله لخوا پیغمبر او استاذې یم ، هغه الله تعالی چه د هغه په اختیار او ملکیت کښی د اسمانونو او ځمکی پاچاهي ده، نو نشته لایق د عبادت او بندګۍ مګر همغه یو الله تعالی دې چه ژوندي کول او مړه کول کوي، نو تاسو ایمان راوړۍ په الله تعالی او د هغه په رسول باندی، داسی پیغمبر چه په اصل کښی امي او ناخوانه دې(خو وحي ورته د الله تعالی لخوا راغلی ده)، او داسی پيغمبر چه هغه پخپله هم په الله تعالی او د هغه په کلماتو ایمان لري، ددي لپاره چه تاسو په سمه لار شۍ».

نو هغه څوک چه د رسول الله صلی الله عليه وسلم  اتباع او پیروي کوي همدې په سمه لار دې، او هرڅوک چه له ده څخه سرغړونه کوي نو همدې ګمراه او بی لاری دې، الله جل جلاله فرمایي:

﴿وَمَن يُشَاقِقِ ٱلرَّسُولَ مِنۢ بَعۡدِ مَا تَبَيَّنَ لَهُ ٱلۡهُدَىٰ وَيَتَّبِعۡ غَيۡرَ سَبِيلِ ٱلۡمُؤۡمِنِينَ نُوَلِّهِۦ مَا تَوَلَّىٰ وَنُصۡلِهِۦ جَهَنَّمَۖ وَسَآءَتۡ مَصِيرًا ﴾ [النساء: 115].

ترجمه: «او هغه څوک چه مخالفت او سرغړونه وکړي له پیغمبرصلی الله عليه وسلم   څخه وروسته له هغه چه ده ته ښکاره شو هدایت او لارښوونه د رسول اللهصلی الله عليه وسلم  ، او پیروي وکړي د مسلمانانو له لاری نه غیر د بلی لاری، نو مونږ به یي هغه خواته وګرزوو چه دې ورته ګرزیدلې دې، او جهنم ته به يي ننباسو، او ډیر بد ځاي د ورتللو دې».

نو هر څوک چه په هر کار کښی د الله تعالی او دهغه د رسول صلی الله عليه وسلم څخه سر غړونه کوي، هغه ددغه ګناه په سبب فاسق دې، او پخپل دغه کار کښی ګمراه او بی لاری دې، اګر که هغه ځان ته بانی لټوي چه یا یي کوم مصلحت لټولو، او یا هم د کومی مفسدی مخنیوې یي کولو؛ ځکه د الله تعالی څخه په سرغړونه هیڅ ډول مصلحت لاس ته نه راځي، او همدارنګه د الله تعالی په قهر کولو باندي د هیڅ ډول مفاسدو مخه نه نیول کیږي.

او هرڅوک چه د الله تعالی او د هغه د رسول صلی الله عليه وسلم څخه په سرغړونه باندی امر کوي او دا کار خلکو ته ښه ښکاره کوي نو دا شخص شیطان دې، هغه که بشري شیطانان وي او که جنّي شیطانان وي؛ ځکه د اسلام څلورم خلیفه علي بن ابي طالب رضی الله عنه  فرمایي:

«لَا طَاعَةَ لِمَخْلُوقٍ فِي مَعْصِيَةِ اللهِ عَزَّ وَجَلَّ». [رواه أحمد ومسلم].

ترجمه: «یعنی د الله تعالی په مخالفت او سرغړونه کښی د هیچا اطاعت او پیروي روا نه ده».

او په دی کښی ټول هغه څوک شامل دي چه په عقیده، عباداتو او معاملاتو او د ژوند په نورو اړخونو کښی د الله تعالی په مخالفت او سرغړونه امر کوي او دغی خوا ته خلک بلي.

همدارنګه هرڅوک چه د بدعت یا د رسول الله صلی الله عليه وسلم  له طریقی څخه بلی طریقی ته بلنه ورکوي، نو دغه شخص پخپله هم ګمراه او  بی لاری دې، او نور هم له سمی لاری بی لاری کوي، الله سبحانه وتعالی  فرمایي:

﴿وَأَنَّ هَٰذَا صِرَٰطِي مُسۡتَقِيمٗا فَٱتَّبِعُوهُۖ وَلَا تَتَّبِعُواْ ٱلسُّبُلَ فَتَفَرَّقَ بِكُمۡ عَن سَبِيلِهِۦۚ ذَٰلِكُمۡ وَصَّىٰكُم بِهِۦ لَعَلَّكُمۡ تَتَّقُونَ ﴾ [الأنعام: 153].

ترجمه: «او بیشکه دغه مخکښی بیان شوی شیان ځما خوا ته لار ده سمه، نو پدغه لار پسی ورپسی شۍ او پیروي یي وکړۍ، او پیروي مه کوۍ د نورو لارو؛ ځکه په دغه سبب به د الله تعالی لاری نه بي لاری شۍ، او په همدی کار باندي الله تعالی تاسو ته وصیت او کلک امر کوي ددی لپاره چه تاسو د هغه د مخالفت او سرغړونی څخه ځان وساتۍ».

آن لاين اسلامي لارښود

Print Friendly, PDF & Email

اترك تعليقاً

آن لاين اسلامي لارښود حفظها الله په افغانستان کې د اهل سنت والجماعت (مذهب امام ابوحنيفه رحمه الله ) د ديني څيړنو او تحقيقاتو يوه معتبره پاڼه ده چې هدف يې ټولنې ته د شرعي اوامرو رسول د کفر ، شرک ، بدعت او ټولو نا روا کړنو پر وړاندې په دلائلو ولاړه کلکه مبارزه ده دا پاڼه کاملاً شخصي ده او مصارف يې کاملاً شخصي د انفاق فی سبيل الله څخه دي