د سفر لپاره مو څه تيار کړي دي ؟


بسم الله الرحمن الرحيم

وروره او خورې!

د سفر د پاره دې څه برابر کړي ؟
کوم چې د مرګ او آخرت سفر دی ،هغه سفر چې د دنيا نه د آخرت په لوري دی د يو کور نه بل کور ته سفر دی او داسې سفر دی چې يوازې به وې.
په دنيا کې ستا هميشه اوسيدل نه دي بلکي دلته د څو ورځو مسافر يې .
جناب رسول الله صلی الله عليه وسلم فرمايي :
{ كن في الدنيا كأنك غريب أو عابر سبيل } [رواه البخاري]

يعنې : په دنيا کې د مسافر او لاروي په شان ژوند وکړه .
او ابن عمر رضی الله عنهما ته رسول الله صلی الله عليه وسلم داسې وصيت کړی ؤ :
: ( إذا أمسيت فلا تنتظر الصباح، وإذا أصبحت فلا تنتظر المساء، وخذ من صحتك لمرضك، ومن حياتك لموتك ) [رواه البخاري].

کله چې شپه شوه د سبا انتظار مه کوه ، او کله چې سبا شو د بيګا انتظار مه کوه ، د روغيا له وخت څخه دې د مرض د وخت استفاده وکړه او په ژوند کې د مرګ د پاره اماده ګې ونيسه .

وروره او خورې !

ژوند د وريځې په شان تېريږي او آخر پای ته رسيږي او دلته هميشه ژوند د هيڅ چا د پاره نشته ، بلکي ټول به مري : لقوله سبحانه وتعالی : وَمَا جَعَلْنَا لِبَشَرٍ مّن قَبلِكَ الْخُلْدَ أَفَإِن مّتَّ فَهُمُ الْخَالِدُونَ” [الأنبياء:34]

ژباړه : (ای محمده !) له تا نه وړاندې مونږ هيڅ انسان ته هميشه ژوند او تل پايښت نه دی ورکړی . که ته مړ شي نو دوی به تل ترتله ژوندي وي ؟

هر څه فنا کيدونکي دي :

” كُلُّ مَنْ عَلَيْهَا فَانٍ (26) وَيَبَقَى وَجْهُ رَبِكَ ذُو الْجَلالِ وَالإكْرَامِ ” [الرحمن:27،26].

ژباړه : هر څه چې د ځمکې پر مخ دي ټول له مينځه تلونکي دي . او يوازې ستا د رب لوی او عزتمن مخ به تل پاتې وي .
“إِنَّمَا هَذِهِ الْحَيَاةُ الدُّنْيَا مَتَاع وَإنَّ الآخرةَ هِي دَارُ الْقَرَارِ ” [غافر:39]
ژباړه : يقيناً د دغه دنيا ژوند معمولي ګټه ده ، او تل پاتې کور د آخرت دی .
انسان په خپل لڼد دينوي سفر کې هره ورځ د تګ په حال کې دی ، ورځې تېريږي ، مياشتې او کالونه تېريږي او د هرې ورځې په تېرېدو سره د قبر طرف نږدې کيږي .

قبر د عالم برزخ او آخرت لومړی کور دی ، چې د همدې کور څخه د دنيوي ژوند د کړو وړو پوښتنې او حساب پيل کيږي :
“أَفَحَسِبْتُمْ أنَّما خَلَقْنَاكُم عَبَثاً وَأنكُمْ إلَينْاَ لا تُرْجَعُونَ” [المؤمنون:115].
ژباړه : آيا تاسې ګمان کاوو چې مونږ هسې بابېزه پیدا کړي يئ ؟ او مونږ ته بيرته نه راګرځول کيږئ .

وروره او خورې !

د دنيا ژوند ډير لږ او محدود دی پام چې غفلت ونه کړئ ، د خپل لوی سفر د پاره مو تياری ونيسئ ، هغه سفر چې تنها دی ، کله چې په قبر کې دفن شوئ ، بيا څوک د ستا د حال نه خبريږي ، څوک مرسته نشي در سره کولای ،نو همدا اوس د هغه تنهايي او يوازېوالی کور د پاره ملکرۍ پيدا کړه ، د ځواب ورکولو د پاره ځان آماده کړه او هلته د اسيدو د پاره څه در سره يوسه .

په خپلو عملونو باندې فکر او غور وکړئ چې څه مو کړي دي .
که مو د ګناه او نافرمانۍ کارونه کړي وي په هغه باندې توبه وباسئ ، الله تعالی خو بښونکی او مهربان دی هغه خو توبه کوونکي خوښوي .

د ټولو ګناهونو څخه صادقانه توبه وباسئ، د ښو کارونو کلک عزم وکړئ.

په توبه ايستلو او ښو اعمالو کې ډيره بيړه وکړئ ځکه د سفر کاروان د حرکت په حال کې دی او وخت يې نه دی څرګند نا څاپه د رسيدلو آواز کوي .

” يَا أيُهَا الْذيِنَ آمَنُوا اتَّقُوا الله ولْتَنظُرْ نَفْس مَّا قَدَّمتْ لِغَدٍ وَاتَّقُوا الله إنَّ الله خَبِير بِمَا تَعْمَلُونَ ” [الحشر:18] .

ژباړه : ای مؤمنانو ! له الله وډار شئ او بايد هر څوک وګورئ چې د سبا لپاره یې څه لېږلي دي . له الله وډار شئ يقيناً چې الله پاک ستاسو له کړنو څخه ښه خبر دی .
ابن کثير رحمه الله وايي : “ولتَنَظُر نَفْس مَّا قَدَّمَتْ لِغَدٍ” مطلب دا دی چې له خپلو ځانونه سره مو حساب وکړي مخکې له دې چې ستاسې سره حساب وشي ، د توبې او ښو اعمالو په کولو کې ولې منظر ياست؟ حال دا چې تاسې ته د خپل ژوند نيټه نه ده معلومه او د هغه علم له الله تعالی سره دی .
وروڼو او خوندو:  په آخر کې د الله تعالی دغه مهربانه چې خپلو بنده ګانو ته یې کړې ده له ياده مه باسئ :

يَا عِبَادِيَ الَّذِينَ أَسْرَفُوا عَلَى أَنفُسِهِمْ لاَ تَقْنَطُوا مِن رَّحْمَةِ اللَّهِ إِنَّ اللَّهَ يَغْفِرُ الذُّنُوبَ جَمِيعًا إِنَّهُ هُوَ الْغَفُورُ الرَّحِيمُ (الزمر 53 )

ای زما  بنده ګانو!  کومو کسانو چه پر خپلو ځانونو تيری کړی دی د الله له رحمت څخه مه ناهيلې کيږی يقينًا الله ټولی ګناوی بښي هغه خو بښونکی اومهربان دی .

آن لاين اسلامي لارښود

 

Print Friendly, PDF & Email

اترك تعليقاً