د ماشومانو د پاره د بدراو دودول څنګه دي ؟

السلام علیکم ورحمت الله : آیا د ماشومانو لپاره د نظر د ماتولو په خاطر د ماڼو،بدراو او داسی نورو شیانو دودول جایز دی او که څنګه؟

عبدالرحمن

ځواب

بسم الله الرحمن الرحيم

له پخوا زماني څخه د ځنو نباتاتو ،پلتو او نورو دودول يا لوګئ کول د نظر د دفع او د شيطانانو د شړلو لپاره په خلکو کې رواج لري ولی دا کار په اسلام کې هيڅ اصل نه لري او نه هم په رواياتو کې ورته اشاره شوی ده .

د سترګو نظر حق دی د قرآنکريم په لاندې ذکر شوو دؤ آيتونو کې ورته اشاره شوی ده .

وَقَالَ يَا بَنِيَّ لَا تَدْخُلُوا مِنْ بَابٍ وَاحِد (67 يوسف )ٍ

(او ويی ويل :ای زما زامنو ! په يوه دروازه ښار ته مه ننوځئ ) .

دجمهورو مفسرينو په قول يعقوب عليه السلام ويريده که يې زامن له يوی دوازې ننوځې نظر به شي ځکه چې هغوی ډير ښکلي وو . (تفسير انوارالقرآن 3/150 ) .

وَإِنْ يَكَادُ الَّذِينَ كَفَرُوا لَيُزْلِقُونَكَ بِأَبْصَارِهِمْ (51 القلم )

 دغه آيت شريف د د سترګو د زخم او تأثير د حقيقت دليل دي د سترګو نظر حق دی چې تأثير یې د الله تعالی په اراده پورې اړه لري .

په حديث شريف کې راغلي «… والعين‌ حق ( د سترګو نظر يا تأثير حق دی ) »

همدارنګه بل حديث شريف کې دي: «قد تدخل‌ الرجل‌ العين‌ في‌القبر، وتدخل‌ الجمل‌ القدر:  (ځنې وخت د سترګو نظر سړی په قبر کې او اوښ په ديګ کې ننباسي ) .

حسن بصري رحمه الله وايي : د سترګو د نظر علاج دغه  [وَإِنْ يَكَادُ الَّذِينَ كَفَرُوا لَيُزْلِقُونَكَ بِأَبْصَارِهِمْ ]  دی  .

(تفسير انوارالقرآن مختصر تفاسير : ابن کثير ، منير او فتح القدير 6/408 ) .

د سحر او انس او جن د ضرر د دفع ، وسواسو او په خوب کې د ماشومانو ويريدلو د دفع لپاره د [قُلْ أَعُوذُ بِرَبِّ الْفَلَقِ]  او [قُلْ أَعُوذُ بِرَبِّ النَّاسِ]  سورتونه دي .

حکيم امت علی تهانوي رحمه الله ليکي : که ماشومان ژاړي ، په خوب کې ويريږي او يا نظر شي دغه آيتونه د [قُلْ أَعُوذُ بِرَبِّ الْفَلَقِ ] او [قُلْ أَعُوذُ بِرَبِّ النَّاسِ] ورباندې دم کوئ (زيوربهشتي حکيم امت ) .

وبالله توفيق

آن لاين اسلامي لارښود