السلام عليکم ورحمته الله وبرکاته
الله ج دی تاسی ته ددی لوی کار چې شروع کړی مو دی اجرونه او جنتونه درکړي الله ج مو سر لوړی لره.
۱ د صحيفو په باره کې که لږ معلومات راکړي چې دا څه قسم وي او په کومو پيغمبرانو باندی نازيلی شوي وي؟
حيات هجران
ځواب :
بسم الله الرحمن الرحيم
الله جل جلاله د انسانانو د هدایت د پاره د بشریت په هره دوره کې کتابونه او صحيفې نازل کړي دی چې په لاندې ډول بيانيږي .
– آسماني کتابونه څلور دي :
الزبور : د زبور آسماني کتاب په حضرت داود عليه السلام نازل شوی دی قوله تعالی : وَآتَيْنَا دَاوُودَ زَبُورًا (الاسراء 55 ) .
التوراة : د تورات آسماني کتاب په حضرت موسی عليه السلام نازل شوی دی قوله تعالی : إِنَّا أَنزَلْنَا التَّوْرَاةَ فِيهَا هُدًى وَنُورٌ (المائدة 44 ) .
الانجیل : د انجيل اسماني کتاب په حضرت عسی عليه السلام نازل شوی دی قوله تعالی : وَآتَيْنَاهُ الإِنجِيلَ فِيهِ هُدًى وَنُورٌ وَمُصَدِّقًا لِّمَا بَيْنَ يَدَيْهِ مِنَ التَّوْرَاةِ وَهُدًى وَمَوْعِظَةً لِّلْمُتَّقِينَ (المائدة 46 )
الفرقان : د قرآنكريم ورستې آسماني کتاب په حضرت محمد صلی الله عليه وسلم نازل شوی دی قوله تعالی : إِنَّا أَنزَلْنَاهُ قُرْآنًا عَرَبِيًّا لَّعَلَّكُمْ تَعْقِلُونَ (يوسف 2 ) .
او همدارنګه د صحیفو په اړه الله تعالی فرمايي : إِنَّ هَذَا لَفِي الصُّحُفِ الأُولَى 18 صُحُفِ إِبْرَاهِيمَ وَمُوسَى 19 (الأعلی ) .
(يقيناً دا خبره په راغلو مخکنيو صحیفو کې وه په صحيفو د ابراهيم او موسی کې )
اجري د حضرت ابوذر عفاري رضی الله عنه نه روايت کوي چه دوی له رسول الله صلی الله عليه وسلم نه پوښتنه وکړه چه د حضرت ابراهيم صحيفې څنګه او څه وې ؟ دوی وفرمايل : چه په دغو صحيفو کې د عبرت مثالونه بيان شوې وو چې په يوه مثال کې ظالم پاچاه ته خطاب کړی وو او فرمايلي وو چه ای پر خلکو مسلط کيدونکی مغروره ، ما تالره حکومت ددې د پاره نه درکړی چې د دنيا مال جمع کړې بلکه ما تا لره اقتدار ځکه درکړی وو چې ته د مظلوم ښيرې ما ته را رسيدو ته پرې نږدې ځکه چې زما قانون دا دی چې زه د مظلوم دعا نه رد کوم اګر که هغه د کافر د ژبې نه وتلې وي .
همدارنګه ابوذر رضی الله عنه فرمايي چې بيا ما عرض وکړ چه د حضرت موسی عليه السلام په صحيفو کې څه وو ؟ دوی وفرمايل چه په هغه کې ټول عبرتونه وو چې د هغه څو کلمې دا دي : زه تعجب کوم په هغه کس چې په مرګ يقين لري بيا هغه څنګه خوشحاله او مست اوسيږي ، او زما تعجب دی په هغه چا کوم چې په تقدير ايمان لري هغه څنګه عاجز او غمګين وي ، او زما تعجب دی په هغه چا کوم چې ددې دنيا انقلابونه او د خلکو لوړيدل او ټيټيدل ويني هغه څنګه په دنيا مطمئن کيږي ، او زما تعجب دی په هغه چا کوم چې په آخرت يقين لري هغه (ښه ) عمل څنګه پريږدي .
(معارف القرآن تفسير پاره 30 سورة الأعلی ) .
په حديث شريف کې دي چې ابوذر رضی الله عنه له رسول الله صلی الله عليه وسلم نه پوښتنه وکړه چه الله تعالی څو کتابونه نازل کړي دي ؟ ويې فرمايل : « سل صحيفې او څلور کتابونه …… (ابن کثير – انوارالقرآن تفسير ج 6 سورة الاعلی ) .
چې بيا دا صحيفې په آدم عليه السلام ، شيش علیه السلام ،ادريس عليه السلام ،ابراهيم عليه السلام او موسی عليه السلام نازلې شوې دي دغه د صحيفو نزول پر پيغمبرانو او تعداد يې د ابوذر رضی الله عنه په روايت کې ذکر شوی دي کوم چې ابن حبان نقل کړی دی د ابوذر دا روایت د علم حديث علماء ضعيف بولې چې صحت به يې الله تعالی ته معلوم وي .
خو اصلي مقصد دادی چې مونږ مسلمانانو په هغه څه باندې ايمان لرو کوم د الله تعالی د طرف نه نازل شوی دي (دا چې تعداد يې لږ دی او که ډير هغه به الله تعالی معلوم وي ) .
قوله تعالی : آمَنَ الرَّسُولُ بِمَا أُنزِلَ إِلَيْهِ مِن رَّبِّهِ وَالْمُؤْمِنُونَ كُلٌّ آمَنَ بِاللّهِ وَمَلآئِكَتِهِ وَكُتُبِهِ وَرُسُلِهِ (البقره ۲۸۵ ) .
زباړه : (رسول الله صلی الله علیه وسلم ) په هغه څه ايمان راوړی چې په ده باندې له جانبه د رب د ده نازل شوي دي او مؤمنانو هم (ايمان راوړی ) . دوی ټولو په الله تعالی ، د هغه پر فريښتو ، د هغه په کتابونو او د هغه په رسولانو ايمان راوړی دی .
والله تعالی اعلم
آن لاين اسلامې لارښود
السلام عليکم ورحمته الله وبرکاته
ډیره زياته مننه الله ج مو سر لوړي او بريالي لره په دواړو دارينو کې
امين
په مينه