د رجعت کولو او نه کولو له مخې د طلاقونو ويش :

د رجعت کولو او نه کولو له مخې طلاق په دری ډوله دی ۱- رجعی طلاق ۲- بائِن  طلاق ۳ – مغلظه طلاق 

۱- رجعی طلاق :

رجعي طلاق هغه طلاق دی چې وروسته له پښېدو نه ، د عدت (پاکی ) په وخت کې بيرته ګرځيدل پکې رواه دي.

هر کله چه يوې ښځې ته په صريحو الفاضو کې رجعي طلاق ورکړ شي او بيا دعدت ( دريوحيضو مودې ) په د ننه کې طلاق ورکوونکي ته پيښماني پيدا شي نو هغه پرته له نويې نکاح نه هم ښځه پخپل عقد کښې ساتلی شي او بيرته رجعت ورته کولای شي که ښځه رضا وي او که نه .

د پاکی په وخت کې حکمت دادی چه دغه وخت د پخلاينې ،رجعت يا د طلاق له فيصلې څخه د په شاه کيدلو چانس ډير وي ، نو ځکه د حيض په موده کې طلاق ورکول ګناه ده .

دعدت (دريو حيضو مودې ) حکمت دا دی چې پر دغو ورځو کې به خاوند پر خپله فيصله ښه غور وکړي او ښځه به هم د خپل خاوند د رضا کېدو لپاره د حل لارې ولټوي ، بل دا چې پدې موده کې د نکاح تقدس او اهميت څرګنديږي ، داسې نه چه کوم څوک ښځی ته طلاق ورکړي نو هغه فوراً وځی او بل ميړه به کوي ،نو پدې سره به د نکاح اهميت له مينځه ولاړ شي .

د رجعي د طلاق د واقع کېدو شرطونه :

۱- دا چې رجعي طلاق به واضح او صريحو الفاظو وي لکه : ته پر ما طلاقه يې ، تا ته طلاق دی که نيت يو طلاق وي يوازې يو رجعي طلاق واقع کيږي که دوه ځله يې تلفظ کړی وي او نيت يې يو طلاق وي یو رجعي طلاق واقع کيږي او که ووايي : ته طلاقه يې ، ته طلاقه يې ، ته طلاقه يې که نيت دری طلاقه وي نو دری طلاقه پرېوځي .

۲- هغه طلاق چې قاضي د نفقې نه ورکولو يا ايلاء په وجه ورکړی وي رجعي طلاق بلل کيږي .

رجعت کله صحي کيږي :

رجعت يا ښځې ته د نکاح لپاره رجوع او ګرځيدل د عدت په وخت کې صحي کيږي

مګر که د عدت تر پايه پورې ښځې ته رجوع ونه کړي رجعت نه صحي کيږي بائن طلاق ګرځي چې بيا بغير د نکاح د عقد د جديد څخه رجوع نشي کولای .

إذا تمت المراجعة قبل انقضاء العدة، فإذا انتهت العدة انقلب الطلاق الرجعي بائناً، فلا يملك الزوج إرجاع زوجته المطلقة إلا بعقد جديد(فقه اسلامي وادله )

وقال الكاسانيّ‏:‏ من شروط جواز الرّجعة قيام العدّة فلا تصحّ الرّجعة بعد انقضاء العدّة، لأنّ الرّجعة استدامة الملك، والملك يزول بعد انقضاء العدّة، فلا تتصوّر الاستدامة، إذ الاستدامة للقائم لصيانته عن الزّوال

 د طلاق رجعي ښځی لپاره څه کول پکار دي ؟

ښځه به په دغه موده کې زيات کوښښ کوي چه خراب شويو تعلقات کې  ټينګښت راولي ددې له وجی فقهاؤ ليکلي چې ښځې لره مستحب ده چه خپل ځان ښه سينګار کړي او هم پدې دوران کې به د خاوند په کور کې اوسيږي ، او داسې طرزالعمل اختيارول پکار دي چه خاوند دوباره خپل ځان ته مايل کړي .

په طلاق رجعي کې خاوند لپاره څه کول پکار دي ؟

رجعي طلاق ورکوونکی به په بار بار په خپله فيصله له سره ښه غور او فکر کوي چه پدې عمل يعنې طلاق سره خپله زړه خپلوي په کامله ټوګه له مينځه وړل او د خلکو نفرت ته د ځان ورکول څه وړه خبره نده .

خو که بيا هم پر خپله فيصله کلک ولاړ ؤ او ښځه د اصلاح وړ نه وه او نور نه غواړي چې دا خپلوي ټنګه کړي نو بيا به د ده طرزالعمل د ښځی سره داسې کول پکار دی لکه د يوې پردی ښځې سره دا خو د عدت په دننه کې ده کله چه عدت تير شي نو ښځه به د خاوند کور پريږدي او وځي به .

د رجعت کولو طريقه :

رجعت په قول او فعل دواړو صحي کيږي .

قول : دا چې ښځې ته ووايي زه تا ته رجوع کوم ، همدارنګه په کنايي الفاظو هم صحي کيږي داسې چې ورته ووايي ، ته د پخوا په څير زما ښځه يې .

فعل : رجعت په جماع کولو يا د جماع د پيل په اسابو لکه : په شهوت سره هغې ته کتل ، مچې کولو و غيره سره صحي کيږي .

جاء في الهداية ‏”‏ قال‏:‏ أو يطأها، أو يلمسها بشهوةٍ، أو ينظر إلى فرجها بشهوةٍ، وهذا عندنا ‏”‏، وقولهم هذا مرويّ عن كثيرٍ من التّابعين، وهم سعيد بن المسيّب، والحسن البصريّ، ومحمّد بن سيرين، وطاوس، وعطاء بن أبي رباحٍ، والأوزاعيّ، والثّوريّ، وابن أبي ليلى، والشّعبيّ، وسليمان التّيميّ، وصرّح الحنفيّة بأنّه لا يكون النّظر إلى شيءٍ من جسد الزّوجة سوى الفرج رجعةً‏.‏

د رجعت ځنې نور احکام :

په رجعت کې شهادت يا د شاهدانو نيول د امام ابوحنيفه او امام مالک په نزد مستحب دي .

د رجعت کولو اعلان د جمهورو فقهاؤ په نزد مستحب دی .

د رجعي طلاقي شوي ښځې سفر کول د امام زفر حنفي او امام احمد په نزد رجعت بلل کيږي مګر د جمهورو فقهاؤ په نزد د رجعي مطلقې سره سفر کول جواز نه لري ځکه خاوند يې په دې باندې مأمور دی چې هغه له کور ونه باسي ، لقوله سبحانه وتعالی : لقوله تعالى‏:‏ ‏{‏لا تُخْرِجُوهُنَّ مِن بُيُوتِهِنَّ‏}

۲- بائن طلاق يا رجعې څه وخت بائن ګرځي :

بائِن طلاق هغه طلاق دی چه نکاح ورباندې ماتيږي ښځه د نوې نکاح په کولو دوباره له سره نکاح کيږي    که د يوه يا دؤ صريح طلاقو ورکولو نه پس يی په ټول عدت کې هغه ته رجوع ونکړه نو اوس دعدت يعنې دريو حيضو د مودې تيريدو نه پس که چری ښځی ته يې يو طلاق ورکړی وی نو يو طلاق بائن به پريوځي او که دوه طلاق يې ورکړی وي نو دوه بائن به پريوځي .

اوس که دی بيا په خپل عقد د نکاح کی راوستل غواړي نو دوباره به نکاح کوي په نکاح کی د دواړو رضا شرط ده.

۳- طلاق مغلظه :

که چيرې سړی د يوه يا دوه طلاقو پر ځای دری طلاقه ورکړي، نو اوس نه خو رجعت کولی شي او نه نوی نکاح نو اوس يوه لاره شته چه هغه حلاله ده او بس .

حلاله : دا چې دغه ښځه تر هغه پورې څو يې عدت تير شي بل کس سره نکاح او جماع وکړي وروسته هغه کس مړ شي يا طلاق ورکړي نو بيا لومړی خاوند ته روا کيږي .

په يو ځل دری طلاق ورکول ګناه او د سنتو خلاف عمل دی .

د بائن او مغلظه طلاقې ښځی لپاره څه کول پکار دي ؟

کومې ښځې ته چه طلاق بائن يا مغلظه ورکړ شوی وي هغه به له خاوند څخه هر ډول تعلقات پرې کوي او ديوه بيګانه سړي په څير به ورڅخه پرده کوي .

عدت به د خاوند په کور کې تيروي او نفقه په خاوند لازمه ده ځان به هم نه سينګاروي .

آن لاين اسلامي لارښود

Print Friendly, PDF & Email