په نکاح کې کفائت (سيال او برابر)

اسلامي شريعت د خاوند او ښځې د ښه او نيکمرغه ژوند تيرولو د پاره په نکاح کې د نورو قيدونو سربېره دا قيد هم لګولی دی چې په نکاح او رشته قايمولو کې د ديني معاشرې او معاشرتي مناسبت هم په پام کې ونيول شي دې مناسبت او برابرۍ ته په اسلامي شريعت کې کفائت وايي .

کفائت : په لغت کې برابری ته وايي د فقهاؤ په اصطلاح کې د ميړه او ښځې تر مينځ په خاصو حالاتو کې مناسبت او برابرۍ ته کفائت وايي .

د کفائت شرطونه :

 دينداري او تقوی ، آزادي ، نسب ، مال او کسب او کار بار .

دينداري او تقوی:

ددې څخه مطلب د دين پر أحکامو باندې استقامت دی ، نو هيڅکله يو ښکاره فاسق او فاجر د يوې صالحې او عفيفې ښځې او د صالح او عفيف سړي د لور سره برابر نه دی ، يو پاکه او صالحه ښځه د يو غله او زاني سره برابره نه ده ځکه چې ښکاره فاسق سلب عدالت دی شهادت يې نه قبليږي او پر ښځه باندې د هغه د ناوړه عمل اثر پرېوځي.

آزادي:

 آزاد به وي غلام به نه وي ، آزاده ښځه د غلام سيال نشي کيدای .

نسب : پلار او اجداد به يې اصيل او با وقاره او معلوم وي يعنې نسب به يې څرګند وي .

مال :يعنې چې دومره مال ولري چې د ښځې د نفقې او مهر د ادا کولو توان ولري.

کسب او حرفه : چې د کسب او کار واله سړی وي باګل نه وي[1] .

د کفائت حکم :

د امام ابوحنيفه او امام احمد په نزد د ښځې نکاح کول د هغه کفاء سره واجب ده ، د ولي د پاره حرام دی چې ښځه د غير کفاء سره نکاح کړي :

فَذَهَبَ الْحَنَفِيَّةُ وَالْحَنَابِلَةُ إِلَى أَنَّهُ يَجِبُ اعْتِبَارُهَا فَيَجِبُ تَزْوِيجُ الْمَرْأَةِ مِنَ الأَكْفَاءِ ، وَيَحْرُمُ عَلَى وَلِيِّ الْمَرْأَةِ تَزْوِيجُهَا بِغَيْرِ كُفْءٍ ( الموسوعة الفقهية ) .

کفائت د ځنو فقهاؤ په نزد شرط الزام او د ځنو متأخرينو فقهاؤ په نزد په ځنو حالاتو کې د نکاح شرط بلل کيږي لکه :

کچېرې کومه بالغه او عاقله ښځه د غير کفء سره د هغې د ولي د طرف څخه په زور او جبر نکاح شي او د نکاح د تړون څخه مخکې رضا نه وي دا نکاح اصلاً نه صحي کيږي .

کچېرې د نجلی ولي يا وکيل غير اهل وي ليونی او يا نابالغ وي او نجلی د غير کفء سره نکاح کړي نکاح نه صحي کيږي .

او يا کچېرې يو غير اهل ولي يو صالحه ښځه له يو شراب خور او يا کوم مشهور غله او فاسق سره نکاح کړي نو د غير کفء په وجه د نکاح د فسخې حق لري[2] .

آن لاين اسلامي لارښود

ــــــــــــــــــــــــــــــــــــــــــــــــــــــــــــــــــــــــــ

[1] – فقه الاسلامي و ادلته ، البدائع: ۳۱۸-۳۲۰/۲، الدر المختار ورد المحتار: ۴۳۷-۴۴۵/۲، فتح القدير: ۴۱۹-۴۲۴/۲.

[2] – فقه الاسلامي وادلته ، الدر المختار ورد المحتار: ۴۱۸/۲-۴۲۰، ۴۳۶ .

Print Friendly, PDF & Email

ځواب دلته پرېږدئ

آن لاين اسلامي لارښود حفظها الله په افغانستان کې د اهل سنت والجماعت (مذهب امام ابوحنيفه رحمه الله ) د ديني څيړنو او تحقيقاتو يوه معتبره پاڼه ده چې هدف يې ټولنې ته د شرعي اوامرو رسول د کفر ، شرک ، بدعت او ټولو نا روا کړنو پر وړاندې په دلائلو ولاړه کلکه مبارزه ده دا پاڼه کاملاً شخصي ده او مصارف يې کاملاً شخصي د انفاق فی سبيل الله څخه دي