وليمه (د واده د مراسمو خوراک)

د وليمه کلمه د ولم د لفظ څخه اخيستل شوې چې را ټولېدو او جمع کېدو ته وايي ځکه خاوند او د هغه بې بې سره یو ځای کيږي او په عرف کې هغه عذا او خوراک ته وايي چې د واده د مراسمو لپاره تيار شوی وي .

وليمه د جمهورو فقهاؤ په نزد سنت مؤکد ده ځکه رسول الله صلی الله عليه وسلم په هغه باندې تأقيد کړی دی ، پيغمبر صلی الله عليه وسلم عبدالحمن بن عوف ته وفرمايل:«أَوْلِمْ وَلَوْ بِشَاةٍ» (وليمه ورکړه که څه هم يو پسه يا کډ سره وي) .

د ولېمې دعوت قبلول واجب دي ځکه رسول الله صلی الله عليه وسلم حکم کړی دی چې کله ولېمه ته دعوت شوئ د هغه دعوت قبول کړئ[1].

د وليمې د دعوت قبلولو شرطونه :

۱- دا چې دعوت کوونکی مکلف (آزاد ، بالغ او عاقل ) يا اهل د پوهې او تميز وي .

۲- دعوت بايد يوازې مالدارو خلکو ته خاص نشي او په هغه کې فقيران هم کډون وکړي ، ځکه داسې کول مکروه دي :

په حديث شريف کې راغلي ‌: «شر طعام الوليمة يمنعها من يأتيها ويدعى إليها من يأباها، ومن لم يجب الدعوة فقد عصى الله ورسوله»[2] .

ژباړه :د وليمې تر ټولو بد خوراک هغه دی چې په هغه کې فقيران خلک منع کوي حال دا چې هغوی د دعوت قبلولو ته حاضر وي او هغه ته مالدار خلک را غواړي حال دا چې هغوی د دعوت قبلولو ته حاضر نه وي او هر څوک چې دعوت قبول نه کړي رښتيا چې هغه د الله او د هغه د رسول الله نافرماني کړې ده.

او د بخاري په حديث کې داسې راغلي دي : «شر الطعام طعام الوليمة: يدعى لها الاغنياء، وتترك الفقراء»[3].

ژباړه : تر ټولو بد خوراک د وليمې هغه خوراک دی چې هغه ته مالداره خلک غوښتل کيږي او فقيران پرېښودل کيږي ( نه غوښتل کيږي) .

۳- مشهور قول دا دی چې دعوت بايد د واده په لومړی ورځ وي (بغير د څه ضرورت څخه ).

۴- د دعوت په مجلس کې بايد منکرات او نارواه کارونه نه وي .

۵- ددې دعوت پر مهال بل داسې دعوت نه وي چې هغه تر دې واجبي او لازم وي .

۶- دا چې دعوت شوي کس ته څه عذر نه وي لکه: د لارې زياتوالی چې تګ مشکل وي نو بيا د دعوت رد باک نه لري .

آن لاين اسلامي لارښود

ــــــــــــــــــــــــــــــــــــــــــــــــــــــــــــــــــــــــــــــــــــــ

[1] – جاء في الموسوعة الفقهية :ووليمة العرس سنّة مؤكّدة، وليست واجبةً في قول جمهور الفقهاء، لأنّها طعام لسرور حادث، فأشبه سائر الأطعمة.

أمّا إجابة الوليمة فهي واجبة عيناً على كلّ من يدعى إليها لقوله صلى الله عليه وسلم‏:‏ » إذا دعي أحدكم إلى الوليمة فليأتها  وفي لفظ‏:‏ » أجيبوا هذه الدّعوة إذا دعيتم إليها « ولحديث‏:‏ » من لم يجب الدّعوة فقد عصى اللّه ورسوله »‏.‏

[2] – رواه مسلم .

[3] – رواه البخاري .

Print Friendly, PDF & Email

ځواب دلته پرېږدئ

آن لاين اسلامي لارښود حفظها الله په افغانستان کې د اهل سنت والجماعت (مذهب امام ابوحنيفه رحمه الله ) د ديني څيړنو او تحقيقاتو يوه معتبره پاڼه ده چې هدف يې ټولنې ته د شرعي اوامرو رسول د کفر ، شرک ، بدعت او ټولو نا روا کړنو پر وړاندې په دلائلو ولاړه کلکه مبارزه ده دا پاڼه کاملاً شخصي ده او مصارف يې کاملاً شخصي د انفاق فی سبيل الله څخه دي