خطبه (رېباري يا خواستګاري) د نکاح د پاره د يوې ښځې غوښتلو او د نکاح وړانديز کولو ته وايي ، خطبه د واده مقدمه او پيل بلل کيږي ، خطبه يا خواستګاري اسلامي شريعت په دې وجه مباح ګرځولی ده څو د واده څخه مخکې د نجلی او هلک د صورت او سيرت په اړه معلومات حاصل کړي .

د رېبارۍ يا خواستګارۍ طريقه :

اول : دا چې د خواستګارۍ د پاره کومه ښځه ور وليږي او هغه نجلی وګوري او د هغې د صفاتو څخه ځان خبر کړي ، لکه رسول الله صلی الله عليه وسلم ام سليم يوې ښځې ته د خواستګارۍ د پاره وليږله او داسې ورته وفرمايل : انظري إلى عُرْقوبها، وشَمّي معاطفها(أحمد والطبراني)

يعنې : د هغې د پښو پنډی وګوره او غاښونه ، ګريوان او تخرګ يې بوی کړه .

همداسې د ښځې د پاره جايز دي چې د هلک د کتلو او صفاتو معلومولو د پاره يو سړی وليږي .

دوهم : دا چې خپله سړی ښځه وويني يا ښځه سړی وويني .

د جمهورو فقهاؤ په نزد فقط د مخ ، لاسونو او د امام ابوحنيفه په نزد د پښو کتل جايز دي او بس ځکه د مخ د کتلو څخه يې جمال او ښايست څرګنديږي ، د لاسونو کتلو څخه يې د اندامونو وچوالی او نرموالی معلوميږي او د پښو څخه يې لوړوالی او ټيټ والی معلوميږي .

په دليل د دغه حديث چې جابر رضی الله عنه روايت کړی جناب رسول الله صلی الله عليه وسلم فرمايي :

إذا خطب أحدكم المرأة فإن استطاع أن ينظر منها إلى ما يدعوه إلى نكاحها، فليفعل» ، قال جابر: «فخطبت جارية، فكنت أتخبأ لها، حتى رأيت منها ما دعاني إلى نكاحها، فتزوجتها (أحمد وأبو داود) .

ژباړه :که کله يو د تاسې له کومې ښځې څخه خواستګاري کوئ که توانيږئ نو د هغې څه شيان دې وويني کوم چې د نکاح د پاره يې کتل ضرور وي نو دا کار دې وکړئ . جابر رضی الله عنه وايي :د بنی سلمه د قبلې د يوې ښځې خواستګارې مې وکړه هغې ته په کمين کې کېناستم تر څو د هغې څه شيان مې وليدل چې بلاخره مې واده ورسره وکړ .

جاء في فقه الاسلامي وادله :

يرى أكثر الفقهاء أن للخاطب أن ينظر إلى من يريد خطبتها إلى الوجه والكفين فقط؛ لأن رؤيتهما تحقق المطلوب من الجمال وخصوبة الجسد وعدمهما، فيدل الوجه على الجمال أو ضده لأنه مجمع المحاسن، والكفان على خصوبة البدن أو عدمها.
وأجاز أبو حنيفة النظر إلى قدميها.

ودل الشرع على جواز رؤية من يريد الرجل خطبتها. روى جابر عن رسول الله صلّى الله عليه وسلم قال: «إذا خطب أحدكم المرأة……… » (فقه الاسلامي وادله / دوکتور وهبة الزحيلي ) .

مګر په هيڅ صورت کې به د هغې سره اختلاط ، او ګدون نه کوي بغير د هغې د محرم له موجوديت څخه کيناستل ، کتل ، خبرې کول ، چکر وهل ټول حرام دي .

ځکه خطابة نکاح نه ده بلکي د نکاح خواستګاري يا وعده وي چې د نکاح حکم نه ورباندې جاري کيږي .

رسول الله صلی الله عليه وسلم فرمايي : «لا يخلون رجل بامرأة لا تحل له، فإن ثالثهما الشيطان، إلا مَحْرمٌ»( رواه أحمد والشيخان).

هغه کسان چې د واده مخکې د بيګانه ښځو سره د خواستګارۍ په بهانه چکر وهي ملګري ور سره کوي دا ټول حرام شيطاني صفات دي چې ددې کسانو په اصل کې خطبه او خواستګاري هدف نه وي بلکي هغوی د شيطاني خواهشاتو او غريزو ليوان وي .

د رېبارۍ يا خواستګارۍ د جواز شرطونه :

۱- دا چې خواستګاری به د داسې ښځې وي چې شرعي موانع ونه لري لکه : د نکاح حرمت .

۲- دا چې خواستګاري د ښځې د طلاق ، يا د هغې د خاوند د مرګ په عدت کې نه وي .

۳- دا چې خواستګاري د بلې خواستګارۍ سربيره نه وي کوم چې مخکې بل کس خواستګاري کړي وي څو چې د مخکني کس ځواب نه وي څرګند شوی خواستګاري کول جايز نه دي .

جناب رسول الله صلی الله عليه وسلم فرمايي : ” المؤمن أخو المؤمن، فلا يحل له أن يبتاع على بيع أخيه، ولا يخطب على خطبة أخيه  حتى يذر (المسلم و احمد).

ژباړه : مؤمن د مؤمن ورور دی ، پس هغه ته روا نه ده چې د هغه په معامله کې مداخله وکړي او مشتري خپل ځان ته جلب کړي او نه بايد د کوم کس څخه چې خواستګاري شوی وي خواستګاري وکړي مګر دا چې هغه ته يې د رد ځواب ورکړی وي .

آن لاين اسلامي لارښود

Print Friendly, PDF & Email