د دوو مخالفو جنسونو جوړه او يو ځای کول د الله سبحانه وتعالی له هغو طريقو او سنتو څخه دي چې د هغو په وسيله يې پخپل مخلوق کې د نسل سلسله جاري کړي ده لکه : په انسانانو ، حيواناتو او نباتاتو کې لقوله سبحانه وتعالی :[ وَمِنْ كُلِّ شَيْءٍ خَلَقْنَا زَوْجَيْنِ لَعَلَّكُمْ تَذَكَّرُونَ] (الذارات ۴۷-۴۹ ) .

ژباړه : او د هر شي څخه مو نر او ښځه پيدا کړي تر څو تاسې پند واخلئ .

او فرمايي : [سُبْحَانَ الَّذِي خَلَقَ الْأَزْوَاجَ كُلَّهَا مِمَّا تُنْبِتُ الْأَرْضُ وَمِنْ أَنْفُسِهِمْ وَمِمَّا لَا يَعْلَمُونَ] (يس ۳۶ ) .

ژباړه : پاک او منزه دی هغه الله چې ټول يې جفت ،جوړې جوړې (نر او ښځه ) پيدا کړي دي.

 جفت او جوړه داسې طريق ده چې متعال خدای (جل جلاله) د هغه په وسيله تولد (پيدا کېدل) او تکاثر (زياتېدل ) د نسل جاري کړي دي او ددې په وسيله ژوند ادامه مومي ، الله سبحانه وتعالی فرمايي :

[ يا أیُّهَا النّاسُ إِنَّا خَلَقناکُم مَن ذَکَرٍ وَ أُنثَی] (الحجرات ۱۳ ) .

يعنې : اي خلکو ! يقيناً چې مونږ پيدا کړې يې تاسې له يو سړي چې (آدم ) دی او له يوې ښځې چې (حوا) ده.

او فرمايي :

[يَا أَيُّهَا النَّاسُ اتَّقُوا رَبَّكُمُ الَّذِي خَلَقَكُمْ مِنْ نَفْسٍ وَاحِدَةٍ وَخَلَقَ مِنْهَا زَوْجَهَا وَبَثَّ مِنْهُمَا رِجَالًا كَثِيرًا وَنِسَاءً] (النسآء ۴ ) .

ژباړه : ژباړه : ای خلکو له خپل رب څخه ووېرېږئ ، هغه چې تاسې يې له يو نفس څخه پيدا کړي ياست او د هغه جوړه يې له هماغه څخه پيدا کړه او له هغو دواړو نه يې ډير نارينه او ښځې خواره کړل .

آن لاين اسلامي لارښود

Print Friendly, PDF & Email