د [قانون منع خشونت عليه زنان] سيکولر قانون دوهمه برخه

دريم قانون : د نجلی او يا هلک په انتخاب کې د هغه د ولي مداخله جرم او خشونت دی .

پنځمه ماده کې داسې ليکي : [خشونت است : ممانعت از حق ازدواج يا حق انتخاب زوج] .

د دغه قانون فسادونه په لاندې ډول دي :

اول :

د ډيوکراسۍ د قانون له مخې که کومه نجلی کوم هلک يا هلک نجلی د نکاح د پاره خوښ کړي په هغه کې د ولي مداخله جرم دی يا که نجلی کوم هلک ته ور وتښتي او يا کوم هلک د چا لور وتښتوي هغوی مجرمين نه بلل کيږي ، نکاح يې د اعتبار وړ ده او د هغوی د استقبال د پاره د دوی په اصطلاح د امن کورونه تيار شوی دي .

او ډير ډير د افسوس ځای دا دی چې دغه د امن کورونه (د کفري ديموکراسۍ د فورمول موافق فاحشه خانې ) په داسې خاوره کې جوږيږي چې پر هره لويشت يې د اسلام د بقا او قيام د پاره وينه تويي شوی ده .

او ددې قانون له مخکې د نجلی د ولي هر ډول مداخله کول جرم ګنل کيږي ، حال دا چې په اسلامي شريعت کې د فقهاؤ په اتفاق د ولی د اجازې بغير نکاح باطله ده .

لقوله سبحانه وتعالی :{ و أنكحوا الأيامـى منكم والصــالحين من عبــادكم وإمــائكم } . الآيــة [ النور 32 ] .

(او نا واده هلکان او پېغلې ، نيک غلامان او وينځې مو واده کړئ ) .

په پورته آيت شريف کې خطاب دی د هلک او پېغلې ولی ته .

او رسول الله صلى الله عليه وسلم فرمايې : ( لا نكاح إلا بولي ) رواه أبو داود ( 2085 ) والترمذي (1101 ) وابن ماجه (1881)

يعنې د ولی د اجازې نه بغير نکاح نه صحي کيږي .

وقوله صلى الله عليه وسلم : ( أيما امرأة نكحت بغير إذن وليها فنكاحها باطل ، فنكاحها باطل ، فنكاحها باطل ) رواه أحمد ( 24417) وأبو داود (2083) والترمذي (1102) في صحيح الجامع برقم (2709).

يعنې : کومې ښځې چې د ولی د اجازې بغير نکاح وکړه ، نکاح يې باطله ده ، نکاح باطله ده ، نکاح باطله ده .

د جمهورو فقهاؤ امام شافعي ، امام مالک او امام احمد ، امام محمد حنفی په نزد د ولې د اجازې بغير نکاح باطله ده ، د امام ابوحنيفه په نزد که کومه شريفه ښځه د خپل کفو (سيال ) سره د ولې د اجازې بغير نکاح وکړي دا کار د سنتو خلاف دی مګر نکاح صحيح ده (معارف القرآن) ، د نن زمانې بې شرمه تښتيدل او تښتول هيڅ څوک جايز نشي ګڼلي .

دلته راجح قول د جمهورو فقهاؤ دی هغه دا چې ( دا ډول نکاح باطله ده ) او په دي قول باندې د عثماني خلافت احنافو شپږسوه کاله حکم چلولی دی (موقع الاسلام سوال جواب ) .

دوهم :

په اسلامي شريعت کې د نا محرمو ملګري ، ارتباطات ، خبرې ، ديدن او نور حرام ګرځول شوي دي .

الله تعالی فرمايي : وَلاَ تَقْرَبُواْ الزِّنَى (اسراء ۳۲ )

يعنې زنا ته مه نږدې کيږئ ، د زنا د نږدېوالی اسباب د بيګانه ښځو سره نا مشروع ارتباطات ، اختلاط او بې حجابې ده .

قوله تعالی : وَقُل لِّلْمُؤْمِنَاتِ يَغْضُضْنَ مِنْ أَبْصَارِهِنَّ (النور ۳۱ ) .

يعنې : او ووايه (ای محمده ) ايماندارو ښځو ته چه پټې کړئ (له نامحرموڅخه ) سترګی خپلی .

رسول الله صَلَّى اللَّهُ عَلَيْهِ وَسَلَّمَ : ( إِنَّ اللَّهَ كَتَبَ عَلَى ابْنِ آدَمَ حَظَّهُ مِنْ الزِّنَا أَدْرَكَ ذَلِكَ لا مَحَالَةَ فَزِنَا الْعَيْنَيْنِ النَّظَرُ وَزِنَا اللِّسَانِ النُّطْقُ وَالنَّفْسُ تَمَنَّى وَتَشْتَهِي وَالْفَرْجُ يُصَدِّقُ ذَلِكَ أَوْ يُكَذِّبُهُ ) رواه البخاري (6243) ومسلم (2657)

ابن عباس روايت کوي چې رسول الله صلی الله عليه وسلم فرمايي : الله تعالی د هر چا د پاره د زنا يو حصه تعين کړی ده ، پس د سترګو زنا نا محرم ته کتل دي ، د ژبه زنا خبرې کول دي او د نفس زنا د هغه هيله او آرزو کول او غوښتل دي ، دا شرمګا ده چې بيا د هغه يا تصديق کوي او يا تکذيب .

دريم :

د والدينو په انتخاب کې لوی خير او برکت دی ، ځکه هغوی د خپل اولاد د ښه او سالم ژوند د پاره ډير کوښښ کوي مګر د نجلی يا هلک خپل سری انتخاب اکثراً نا کام وي ، د ټولنيزو چارو عربي عالم إسماعيل عبد الباري ليکي چې د واده نه مخکې عشق او اړيکو واله نکاح او ازدواج 75% خراب وي چې عوامل يې په لاندې ډول دي :

۱- د عشق او محبت په دوران کې هر طرف کوښښ کوي تر څو خپل عيبونه پټ کړي او د خپل محبوب لورې د خوشحالی د پاره ښه اخلاق او رويه کاروي ، خو کله چې د دوی ترمينځ واده وشي او ژوند پيل شي څنګه چې ژوند له مشکلاتو ډک دی نو په کراره کراره د دوی دواړو غيبونه ښکاره کيږي او د بل نه نفرت اختياروي .

۲- عاشقان ګمان کوي چې دا عشق به د ژوند تر پايه دوام لري مګر د ژوند د مشکلاتو او مناظرو سره له مينځه ځي .

۳- د عشق په وخت کې د سړي حقيقي صورت نه څرګنديږي بلکي دوی هغه څه تر سره کوي کوم چې د مقابل لورې رضا په کې وي خو کله چې د واده نه وروسته ژوند پيل شي نو د هغوی دينداري ، اخلاق ، رحم او ادب څرګنديږي چې د عشق د دوران سره به سراسر په ټکر کې وي .

۴- د عشق ژوند او ديدن د سپوژمۍ په شان وي چې د قطع څخه يې وېره لري نو کله چې دوی د واده وروسته په يو اتاق کې ژوند پيل کړي او زړه يې نور صبر شي نو دا ژوند د عشق له ژوند سره ډير توپير لري .

څلورم : د والدينو پر وړاندې بغاوت ، او خپلې کورنۍ او قوم سپکاوی :

ټول ته واضح ده چې دا عمل په افغاني عرف کې سخته د شرم خبره ده چې د کورنۍ او ولس د شرم او سپکاوي سبب ګرځي ، د نجلې د سرپرست يا د هغه د والدينو په حق کې ستر ظلم دی ، ځکه مور او پلار د خپلې لور يا زوی په روزنه او پالنه کې ډير زحمت ګاللی وي ، د نجلی خپل سری واده ، او بل کس ته په بې شرمۍ سره ور تښتيدل يې سخت غمجنوي او واقعاً چې دا کار د والدينو په حق کې ډير لوی ظلم او لڼډغري ده .

خو په لنډه غره ډيموکراسۍ کې والدين څه اهميت نه لري ځکه په لنډغره ديموکراسي کې چې کله د چا والدين د بوډاوالی سن ته ورسيږي نو د خپل کور او اهل نه جلا د ډيموراسي د امن کور ته سپارل کيږي ، نور له خپل اهل عيال څخه جلا او د مرګ تر ورځې د خپل اولاد او اهل په بيلتون او فراق کې ژوند تيروي . ( لعنت الله علی الدموکراسية الطاغوتية ) .

آن لاين اسلامي لارښود

Print Friendly, PDF & Email

یو څرګندون یا تبصره

  1. د آنلاین اسلامی لارښود موفقو علماوو ته سلامونه :
    پس له سلامه زه وایم چی (قانون منع خشونت علیه زنان ) یو غربی او د اسلام سره په ټکر کی قانون دی ، ډیری مادی یی د اسلام سره په ټکر کی دی .څرنګه چی تاسی ددی قانون پورته یوه ماده ذکر کړی ده هیڅ تفاوت د غربی قانون سره پدی نلری چی غرب کی څوک د چا خوښ شو همغه سره ځی یعنی مور ، پلار به یی خبر هم نه وی خو لور او زوی به یی وخته ځان ته یار پیدا کړی وی او که چیری مور او پلار د ځوی او لور ددی کار مخنیوی وکړ نو د بی دینه غربی حکومت لخوا هغه ته اخطار وکول کیږی او آن د زندان تر دروازو او مرګ رسیږی .څرنګه چی افغانستان اوس اشغال دی نو اشغالګر کوښښ کوی چی د غرب لنډغه ډیموکراسی زمونږ په ګران اسلامی هیواد کی د خپل تربیه شوی ګوډاګیانو په واسطه پلی کړی .

اترك تعليقاً

آن لاين اسلامي لارښود حفظها الله په افغانستان کې د اهل سنت والجماعت (مذهب امام ابوحنيفه رحمه الله ) د ديني څيړنو او تحقيقاتو يوه معتبره پاڼه ده چې هدف يې ټولنې ته د شرعي اوامرو رسول د کفر ، شرک ، بدعت او ټولو نا روا کړنو پر وړاندې په دلائلو ولاړه کلکه مبارزه ده دا پاڼه کاملاً شخصي ده او مصارف يې کاملاً شخصي د انفاق فی سبيل الله څخه دي