د قرآنکريم د هر توري په تلاوت سره مؤمن ته لس نيکۍ ليکل کيږي .

له ابن مسعود رضی الله عنه څخه روايت دی چې رسول الله صلی الله عليه وسلم فرمايلي :« مَنْ قَرَأَ حَرْفًا مِنْ كِتَابِ اللَّهِ فَلَهُ بِهِ حَسَنَةٌ، وَالحَسَنَةُ بِعَشْرِ أَمْثَالِهَا، لَا أَقُولُ الم حَرْفٌ، وَلَكِنْ أَلِفٌ حَرْفٌ وَلَامٌ حَرْفٌ وَمِيمٌ حَرْفٌ ». (رواه الترمذي والدارمی و سلسلة صحيحة).

ژباړه: چا چې د قرآن يو حرف ولوستلو، نو هغه لره يوه نيکي ده او د يوې نيکۍ لس چنده بدله ده (د وضاحت لپاره فرمايي 🙂 زه دا نه وايم (يعني زما مطلب دا نه دی) چه الم يو حرف دی، بلکه الف يو حرف دی لام يو حرف دی او ميم  يو حرف دی.

ابی سعيد خدري رضی الله عنه وايي چې رسول الله صلی الله عليه وسلم فرمايي: « يقول الرب عز وجل من شغله القرآن عن ذكري وعن مسألتي أعطيته أفضل ما أعطي السائلين وفضل كلام الله على سائر الكلام كفضل الله على خلقه ». (رواه الترمذی والدارمی و البيهقی فی  شعب الا يمان).

ژباړه: د الله تبارک وتعالی ارشاد دی: چه کوم سړی قرآن مجيد مشغول وساتلو زما په ذکر سره او زما نه په سوال او دعا کولو سره زه به هغه ته د هغې نه غوره ورکړم کوم چه سوال کوونکو او دعا کوونکو ته يې ورکوم او د نورو خبرو په پرتله د الله تعالی کلام يا خبرې ته داسې عظمت او فضيلت حاصل دی لکه د خپل مخلوق په مقابله کې چه الله تعالی ته فضيلت حاصل دی.

د ماهر قرآن مقام

عن عايشه قالت رسول الله صلی الله عليه وسلم :«الماهر بالقرآن مع السفرة الكرام البررة، والذي يقرأ القرآن ويتتعتع فيه وهو عليه شاق له أجران» (رواه مسلم).

ژباړه: د حضرت عايشه رضی الله عنها نه روايت دی چې رسول الله صلی الله عليه وسلم فرمايلي: چا چې په قرآن کې مهارت حاصل کړی وي او هغه د ياد نه يا د مخې نه په بهتره طريقي سره او بې تکليفه روان لولي هغه به د معزز وفا دارو او فرمانبردارو فرښتو سره وي او کوم بنده چه قرآن پاک د ښه نه يادولو يا د نه روانېدو په وجه سره په زحمت او مشقت سره داسې وايي چه په هغی کې نښلي نو هغه ته به دوه اجرونه ورکول کيږي (يو دتلاوت او بل د زحمت او مشقت).

د قرآن تلاوت د غفلت څخه نجات دی :

ابی هريرة رضي الله عنه وايي چې رسول الله صلی الله عليه وسلم فرمايلي :«من قرء عشر ايات في ليلة لم يکتب من الغافلين» (رواه حاکم ،حديث صحيح).

ژباړه: څوک چې لس آيتونه د شپی تلاوت کړي هغه به د غافلينو نه شمارل کيږي.

آن لاين اسلامي لارښود

Print Friendly, PDF & Email