کورنا ابتلاء ده چې ځنې نا څرګند پکې څرګند شول

کورنا ناروغي يوه ابتلاء ده چې الله تعالی خپل بنده ګانو ورباندې آزمايي او مونږ او تاسې وليدل چې ددې ناروغۍ پر مهال ډير نا څرګند پکې را څرګند شول ، ډير ذليل او شرميدلي نور هم پکې ذليل او شرمينده شول :

۱- هغه کسان پکې څرګند شول چې د خلکو له بد حال څخه يې استفاده وکړه ، په تجارت کې یې احتکار وکړ او خپل مالونه يې په څو څنده ګټه پر مظلومو خلکو خرڅ کړل ، د ولس وينې يې وخوړلې او خپله خيټه يې د خبيث مال څخه ډکه کړه ، ځکه احتکار په اسلامي تجارت کې حرام دی او د هغه څخه ګټل شوی مال حرام او خبيث دی .

۲- هغه کسان هم پکې څرګند شول چې د الله تعالی د بنده ګۍ پر ځای يې د کورنا بنده ګي غوره کړه ، له کورنا څخه دومره ويره کول چې د کورنا له ناروغانو سره يې خپل ټول اسلامي اخلاق او اسلامي خواخوږي تر پښو لاندې کړه ، د کورنا ناروغ يې له خپل درملتون او روغتون څخه وشړلو ، د خپلو خپلوانو د ناروغۍ پوښتنه او د هغوی هر ډول مرسته کول يې ترک کړل او دوی يې يوازې پريښودل ، که څه هم د لازمو تدابيرو په صورت کې يې د هغوی سره هر څه کولای شوی .

۳- هغه کسان هم پکې څرګند شول چې د ولس د خدمت او بشر پالنې ناری به يې ډنګولي ، د ناروغانو او عامو اړو کسانو سره د شوي څه کومک لپاره يې خپلې خولې خلاصې کړې او هغه يې پخپلو مردارو کيډو کې واچول .

د بل کس د ناحقه مال خوړل خو اصلاً د اور خوړل دي .

ای کاش د دوزخ د اور او زقوم پر ځای يې نن په انصاف سره خپلې ګيډې ډکې کړی وی ، همدا نن يې له ځانه سره حساب کړی وی او د آخرت د سخت سفر لپاره يې څه تياری نيولی وی ، دا کسان دې پوه شي چې نن تاسې د بيت المال او مظلومو خلکو د مال په چور او خوړلو دومره تيز ورځئ نو تاسې اصلاً د دوزخ په لوري ډير تيز ور روان ياست ، نن به نه پوهيږئ کيدای شي نفساني خواهشاتو خمار کړئ وئ خو ګورئ چې کله مو د ځنکندن نښې ښکاره شي نو ډير ژر به پوه شئ خو هغه وخت به ستاسې دغه پوهاوی څه ګټه ونه لري نو همدا نن پوه شئ ، همدا نن توبه وباسئ ، خاورې وخورئ خو ګورئ د دوزخ اور مه خورئ ځکه چې ددې د هضم توان نلرئ .

فکر وکړئ ای د عقل خاوندانو !

آن لاين اسلامي لارښود

Print Friendly, PDF & Email
آن لاين اسلامي لارښود حفظها الله په افغانستان کې د اهل سنت والجماعت (مذهب امام ابوحنيفه رحمه الله ) د ديني څيړنو او تحقيقاتو يوه معتبره پاڼه ده چې هدف يې ټولنې ته د شرعي اوامرو رسول د کفر ، شرک ، بدعت او ټولو نا روا کړنو پر وړاندې په دلائلو ولاړه کلکه مبارزه ده دا پاڼه کاملاً شخصي ده او مصارف يې کاملاً شخصي د انفاق فی سبيل الله څخه دي