د نکاح ډولونه (صحيح ، فاسده او باطله)

نکاح په صحيح ، فاسده او باطله سره ويشل شوې ده :

اول – صحيح نکاح :

صحيح نکاح هغه نکاح ده چې پورته بيان شوي ارکان او شروط پکې موجود وي .

کله چې د صحيح نکاح عقد وتړل شو نو د ښځې لپاره ټاکل شوی مهر ، نفقه ، استوګن ځای او جامه پر خاوند باندې واجب ګرځي .

د مصاهرت حرمت يې ثابتيږي او د خاوند څخه يې د اولاد نسب ثابتيږي او همدارنګه ارث ثابتيږي .

فاسده نکاح :

فاسده نکاح هغه نکاح ده چې د نکاح د صحت شرطونه پکې موجود نه وي لکه : له شاهدانو څخه پرته نکاح ، مؤقته نکاح ( داسې نکاح چې د يوې مياشتې يا يو کال لپاره تړل شوې وي) ، په نکاح کې د پنځمې ښځې جمع کول ، او په نکاح کې د ښځې سره د هغې خور ، عمه ، خاله ، د ښځې ورېره او د ښځې خورځه جمع کول او د علم او پوهې پرته د داسې ښځې سره نکاح کول چې بل خاوند ولري او داسې ښځې سره نکاح کول چې شرعي حرمت پکې وي .

په پورته بيان شويو صوتونو کې نکاح د امام ابوحنيفه رحمه الله په نزد فاسده او د صاحبانو (امام قاضي ابو يوسف او امام محمد ) په نزد باطله ده .

د فاسدې نکاح حکم :

  • کچېرې دخول نه وي ورسره شوی نو هغې سره دخول حرام دی او مهر ، نفقه او عدت يې نه واجبيږي ، نسب او ارث يې نه ثابتيږي ، پر هغوی باندې واجبه ده چې خپله سره جلا شي کچيرې جلا نشي نو شرعې قاضی به د هغوی تر منځ تفريق راولي .
  • کچيرې د ښځې دخول (خلوت او جماع ) شوې وي نو دا کار ګناه او جرم دی ، د هغوی تر منځ جلا والی واجب دی مګر حد ورباندې نه جاري کيږي مګر که د محارمو سره يې نکاح کړې وي د صاحبانو په نزد پر هغوی باندې حد جاري کيږي او کچيرې د تفريق وروسته جماع وکړي حد ورباندې جاري کيږي او همدارنګه کچيرې څوک د علم او پوهي سره سره د بل کس له ښځې سره نکاح وکړي حد ورباندې جاري کيږي[1] .

باطله نکاح :

باطله نکاح هغه نکاح ده چې د نکاح ارکان او يا د نکاح د عقد د صحت شرطونه پکې موجود نه وي لکه : د غير مميز هلک نکاح ، د مستقبل په صیغه سره تړل شوې نکاح ، په راجح قول سره د محارمو سره نکاح ، د علم او پوهې لرلو په صورت کې د واده شوې ښځې سره نکاح ، د مسلمانې ښځې نکاح له کافر سره او د مسلمان نکاح د غير کتابي ښځې پرته بت پرستې ، اور پرستې او ملحدې سره .

د باطلې نکاح حکم :

په دغه نکاح کې د شرعې نکاح هيڅ اثار نشته ، په پورته صورتونو کې د داسې ښځې سره دخول حرام دی ، نفقه ، مهر ، د خاوند اطاعت نه واجبيږي ، ارث او مصاهرت نه ثابيږي او د قاضي لخوا به سره جلا کيږي .

په دې نکاح کې د صحيح نکاح هيڅ حکم او اثار وجود نلري که څه هم دخول ورسره شوی وي .

آن لاين اسلامي لارښود


[1] – فقه الاسلامي و ادلته ، البدائع:۳۳۵/۲، الدر المختار ورد المحتار: ۴۸۱/۲-۴۸۴،مختصر الطحاوي: ص۱۷۴ .

Print Friendly, PDF & Email
آن لاين اسلامي لارښود حفظها الله په افغانستان کې د اهل سنت والجماعت (مذهب امام ابوحنيفه رحمه الله ) د ديني څيړنو او تحقيقاتو يوه معتبره پاڼه ده چې هدف يې ټولنې ته د شرعي اوامرو رسول د کفر ، شرک ، بدعت او ټولو نا روا کړنو پر وړاندې په دلائلو ولاړه کلکه مبارزه ده دا پاڼه کاملاً شخصي ده او مصارف يې کاملاً شخصي د انفاق فی سبيل الله څخه دي