د عذر پرته په کور کې لمونځ کول

السلام عليکم يوه پښتنه ده؟ بى له عذره په کور کى مونځ کول جايز دي او که نه؟

حميدالله همدرد

ځواب

بسم الله الرحمن الرحيم

د نارينه لپاره په جومات کې د جماعت لمونځ د اکثرو فقهاء په نزد واجب دی او د عذر پرته د هغه ترک کول ګناه او فسق دی.

الله سبحانه وتعالی خپلو مؤمنو بنده ګانو ته داسې حکم کړی دی :[وأقيموا الصلاة وآتوا الزكاة واركعوا مع الراكعين] (سوره البقره ۴۳ ).

ژباړه: ژباړه : لمونځ قايموئ او زکات ورکوئ او رکوع کوئ سره له رکوع کونکو (سره له لمونځ کو نکو) .

رسول الله صلی الله عليه وسلم فرمايلي : «مَنْ سَمِعَ النِّدَاءَ فَلَمْ يُجِبْ فَلاَ صَلاَةَ لَهُ إِلاَّ مِنْ عُذْرٍ» (ابن ماجه و ابن حبان) .

ژباړه : څوک چې آذان واروي او هغه ته ځواب ورنه کړي (جماعت ونه کړي) د هغه لمونځ و نشو مګر دا چې څه عذر وي ( لکه : مرض او ويره ).

رسول الله صلی الله عليه وسلم ته يو ړند سړی راغی او  عرض يې وکړ چې د لارښوونې څوک نه لرم چې جومات مې راولي جناب هغه ته اجازه ورکړه چې لږ لاړ آواز يې ورته وکړ چې « هلْ تَسْمَعُ النِّدَاءَ بِالصَّلاة؟ » (آيا آذان اروې ؟ ) ويې ويل : هو ، رسول الله صلی الله عليه وسلم وفرمايل : نو هغه ته به ځواب ورکوې (رواه مسلم).

حضرت عمرفاروق پخپل دور خلافت کې خپلو ټولو واليانو داسې ليک وليږه :

: [إنَّ أهم أمركم عندي الصلاة فمن حفظها فقد حفظ دينه، ومن ضيّعها فهو لما سواها أضيع، ومن المحافظة عليها أداؤها جماعة فى المسجد] ( رواه موطا امام مالک و ابن القيم الجوزية ص 403 ).

ژباړه: تر ټولو مهم د تاسې له أمور څخه ماته لمونځ دی ،پس هر چا چې د هغه حفاظت وکړ هغې خپل دين وساتلو او چا چې هغه ضايع کړ هغه ته د نورو شيانو ضايع کول آسان دي او د هغه کمال او محافظت دا دی چې لمونځ په جمع په جومات کې ادا شي .

صاحب الدرمختار ابن عابدِين رحمه الله وايي:

ان صلوة الجماعة واجبة على الراجح فى المذهب أو سنّة مؤكدة فى حكم الواجب كما فى البحر و صرحوا بفسق تاركها و تعزيره و أنه يأثم”. (رد المحتار: ۱/۳۳۷، البحر الرائق: ۱/۳۴۱) .

ژباړه: د جماعت لمونځ په راجح قول سره په مذهب کې واجب دی ، سنت مؤکد په حکم د واجب دی لکه څنګه چې په (البحر) راغلی ، ترک کول يې فسق دی او د پرېښودونکې د پاره تعزير دی او هغه ګناهکار دی .

د جماعت د لمانځه ۳۳ فائدې الکتروني کتاب

آن لاين اسلامي لارښود

Print Friendly, PDF & Email
آن لاين اسلامي لارښود حفظها الله په افغانستان کې د اهل سنت والجماعت (مذهب امام ابوحنيفه رحمه الله ) د ديني څيړنو او تحقيقاتو يوه معتبره پاڼه ده چې هدف يې ټولنې ته د شرعي اوامرو رسول د کفر ، شرک ، بدعت او ټولو نا روا کړنو پر وړاندې په دلائلو ولاړه کلکه مبارزه ده دا پاڼه کاملاً شخصي ده او مصارف يې کاملاً شخصي د انفاق فی سبيل الله څخه دي