د کلمې (لا الا الا الله محمد رسول الله ) معنی او شرطونه

پر مسلمانانو باندې واجب ده چې د توحيد په حقيقت پوه شي کوم چې مخکې بيان شو ، د توحيد او رسالت د کلمې په معنی ، مقصد ، حقيقت او شرطونو پوه شي ځکه د کلمې يوازې په ژبه ويل مقصد نه دي .

اول – د لا اله الا الله معنی :

(لا اله) يعنې: نشه معبود بر حق ،( الا الله) مګر يو الله دی .

يعنې د کلمې توحيد دوه ارکان شول :

اول : لا اله – نفی ده ، يعنې د عبادت هيڅ لائق نشته .

دوهم : الا الله – اثبات ، يعنې : مګر يوازې معبود بر حق او لائق د عبادت الله جل جلا له دی .

د «إله» معنی معبود دی، نو ټول هغه عبادتونه او بندګۍ چه د الله تعالی پرته بل چا ته کیږي هغه باطل عبادت دی، او هغه څوک چه د الله تعالی پرته د بل چا عبادت او بندګي کوي هغه مشرک او کافر ګڼل کیږي، لکه چه الله جل جلاله  فرمایي: ﴿ [وَمَن يَدْعُ مَعَ اللَّهِ إِلَهًا آخَرَ لاَ بُرْهَانَ لَهُ بِهِ فَإِنَّمَا حِسَابُهُ عِندَ رَبِّهِ إِنَّهُ لاَ يُفْلِحُ الْكَافِرُونَ] (المؤمنون ۱۱۷ ) .

ژباړه : او هغه څوک چه د الله جل جلاله سره بل معبود هم رابلي چه له ده سره هیڅ ډول دلیل ورباندې نشته، نو بې شکه دده حساب کتاب د الله تعالی سره دی، يقيناً چې کافران بری نشي تر لاسه کولای.

د اسلام لومړی رکن په توحيد او رسالت باندې ايمان راوړل دي :

«بُنِيَ الإِسْلاَمُ عَلَى خَمْسٍ شَهَادَةِ أَنْ لا إله إلا اللهُ وَأَنَّ مُحَمَّدًا عَبْدُهُ وَرَسُولُهُ وَإِقَامِ الصَّلاَةِ وَإِيتَاءِ الزَّكَاةِ وَحَجِّ الْبَيْتِ وَصَوْمِ رَمَضَانَ». [متفق عليه].

ژباړه : د اسلام دین په پنځه بنسټونو باندي جوړ او ولاړ دی، ددې خبرې ګواهي کول چه د عبادت او بندګۍ مستحق او لایق بل هیڅ څوک نشته مګر یواځی الله جلّ جلاله دی، او محمد صلی الله عليه وسلم د الله تعالی ریښتینی پیغمبر او استاذی دی، لمونځ ادا کول ، زکات ورکول ، د بيت الله شريف حج کول او د رمضان روژه نيول .

نو په اسلام کښی لمړنې فرض دا دی چه تر هر څه د مخه د لمړني بنسټ معنی او احکام زده کړل شي؛ ځکه رسول الله صلی الله عليه وسلم  چه کله معاذ بن جبل رضی الله عنه  یمن ته د یو داعي، بلونکي او ښوونکي په صفت لیږلو نو ورته یي وفرمايل: «إِنَّكَ سَتَأْتِي قَوْمًا أَهْلَ كِتَابٍ فَإِذَا جِئْتَهُمْ فَادْعُهُمْ إِلَى أَنْ يَشْهَدُوا أَنْ لاَ إِلَهَ إِلاَّ اللَّهُ، وَأَنَّ مُحَمَّدًا رَسُولُ اللهِ فَإِنْ هُمْ أَطَاعُوا لَكَ بِذَلِكَ فَأَخْبِرْهُمْ أَنَّ اللَّهَ قَدْ فَرَضَ عَلَيْهِمْ خَمْسَ صَلَوَاتٍ فِي كُلِّ يَوْمٍ وَلَيْلَةٍ… الحديث». [متفق علیه]

ژباړه: بې شکه ته داسې خلکو ته ورتلونکې یې چه هغوي اهل کتاب او کتابیان دي، نو لومړې یي باید ددي خبری منلو ته راوبلی چه: نشته وړ، لایق او مستحق دعبادت او بندګۍ مګر یواځی یو الله جلّ جلاله دی، او زه- یعنی محمد صلی الله عليه وسلم – د الله تعالی ريښتينې پیغمبر او استاذې یم، که هغوي درسره دا خبره ومنله، نو بیا ورته وښایه چه الله جل جلاله  پر دوي په هره شپه ورځ کښی پنځه لمونځونه فرض کړي دي…» الحدیث.

خلاصه او لنډه دا چه:

–   د «لا إله إلاَّ الله» معنی دا ده چه: نشته معبود برحق مګر یو الله تعالی دې.

–   توحید تر هغه پوری نشي پلی کیدې چه تر څو له شرک څخه ځان ونه ژغورل شي.

–   زمونږ د پیدایش هدف: یواځی د یو  الله تعالی بندګي کول چه شریک او برخَوال ورسره پکښی نه وي.

–   هغه څوک چه د الله تعالی پرته د بل چا عبادت او بندګي وکړي هغه مشرک او کافر ګڼل کیږي.

–   هر پیغمبر خپل قوم توحید ته رابللی او له شرک څخه يي د ځان ساتلو امر ورته کړې دی.

–   د رسول الله صلی الله عليه وسلم  اصلي دعوت او بلنه هم توحید ته وه، او په شروع کښی یي خپل قوم توحید ته راوبللو، او د وخت پاچاهانو ته يي هم لیکونه واستول چه هغوﺉ ته يي پکښې د توحید دعوت ورکړې وو، او خپلو ملګرو ته یي هم امر کړې وو چه دهغوﺉ ددعوت لمړې ټکې دی توحید ته بلنه وي.

–   د الله تعالی حق پر بندګانو هم همدا توحید دې.

–   هغه څوک چه په ربوبیت او عبادت او بندګۍ کښی الله تعالی يوازې ونه مني، نو هغه مسلمان کیدې نشي، اګر که ځان ته مسلمان هم ووایي.

(عقيدوي درسونه / ابو زکريا اسماعيل الافغاني )

آن لاين اسلامي لارښود

Print Friendly, PDF & Email